Бестамақ ауылдық округі де Жаңа жыл мерекесін ерекше қарсы алды. Бестамақ орта мектебінде округ әкімі Қанат Дәулеталиннің тікелей қатысуымен өткен мерекелік шара жоғары деңгейде өтті. Анар Истегулова басшылық ететін Бестамақ орта мектебінің мұғалімдері кештің көңілді де қызықты өтуіне біркісідей атсалысты. Өнерпаздар ән салып, көпшіліктің қошеметіне бөленді. Мерекелік шараның соңында оқушыларға арнайы Жаңа жылдық сыйлықтар берілді.
Мейірімге мұқтаж жандарды мейірімге бөлеу, қамқорлық таныту әркез құрметке де, алғысқа да лайық. Осы тұста Бестамақ ауылдық округіндегі мүмкіндігі шектеулі 16 балаға Жаңа жылдық сыйлықтар табысталды. Сонымен қатар, 14 көпбалалы отбасы балалары да мереке қарсаңында тәтті сыйлықтар алып, көңілдері көтеріліп қалды.
Ауылдық округ әкімі аппараты өз алдына балаларға мерекелік көңіл-күй сыйлаған кәсіпкерлерге, жергілікті жомарт жандарға ризашылығын білдіріп, игі тілектерін жеткізеді.
Мадина Болатбек