Алға қаласында
жылы аялдама мен жаңа минимаркет ашылды
Алға қаласының тұрғындарына қуанышты жаңалық! Қаланың қоғамдық көлік күтетін жолаушылары үшін жылы аялдама салынды. Бұл бастама жергілікті тұрғындардың тұрмыстық қолайлығын арттыруға бағытталған маңызды жоба болып табылады.
Жаңа аялдама қыркүйек айында салына бастап, бір айдан астам уақыттың ішінде пайдалануға берілді. Бұл игі істі жүзеге асыруға жергілікті кәсіпкер Бақберген Бержан тікелей атсалысты. Алғалықтардың жайлылығы үшін қажетті нысан толығымен кәсіпкердің жеке қаражатына салынды.
Жылы аялдаманың ерекшелігі – оның екі бөліктен тұруы. Жазғы және қысқы деп бөлінген аялдаманың әр бөлігі 15 шаршы метрден, жалпы ауданы 30 шаршы метрді құрайды. Қысқы бөліктің ішіне жылу жүйесі орнатылған. Бұл жолаушылардың суық күндері жылы жерде автобус күтуіне мүмкіндік береді. Қысқы аялдама алғашқы рейстен бастап ашылып, соңғы автобус өткеннен кейін жабылады. Мұндай шара нысанның қауіпсіздігі мен тазалығын қамтамасыз ету үшін ойластырылған. Айта кетейік, аялдаманың тазалығы мен жалпы жағдайына кәсіпкердің өзі жауапты болады.
Жолаушыларға арналған минимаркет
Аялдаманың жанында жолаушылар мен төңіректегі тұрғындарға қолайлы жаңа минимаркет те ашылды. Бұл сауда орнының ассортименті әртүрлі: азық-түлік, жеміс-жидек, шаруашылық бұйымдары секілді қажетті заттардың бәрі бар. Сауда орталығының ашылуы – қалалықтардың күнделікті тұрмысын жеңілдетуге арналған тағы бір тиімді қадам десек те болады.
Алға қаласының тұрғындары кәсіпкердің бұл бастамасын жоғары бағалап отыр. Қыстың суық күндерінде жолаушыларға жылы аялдамада отыру ғана емес, қажет заттарын жақын жерден сатып алу да – үлкен көмек.
Жергілікті биліктің ұсынысын қолдап, оны жүзеге асыруға атсалысқан Бақберген Бержанның бұл ісі өзгелерге үлгі боларлықтай. Қоғам игілігі үшін жасалған әрбір бастама – өз қаламыздың гүлденуіне қосылған үлес.
Алғалықтар жылы аялдаманың игілігін көріп, кәсіпкердің еңбегіне алғыстарын білдіруде. Мұндай нысандардың көбейе түсуі – қаланың келешегі үшін маңызды. «Жақсы іске жан сүйсінеді» дегендей, бұл жоба – игі бастамалардың жарқын үлгісі.
Гүлім КЕНЕШОВА