Алға спортшыларының асқақ жеңістері
Алға ауданының спортшылары соңғы уақытта облыстық және республикалық чемпионаттарда тамаша нәтижелер көрсетіп, ауданымыздың абыройын асқақтатып жүр. 2025 жылы қаңтар айында өткен бірнеше маңызды жарыстар мен чемпионаттарда жастарымыз ерекше көзге түсіп, түрлі дәрежедегі медальдарды жеңіп алды.
Үстел теннисінен Алға БЖСМ табыстары
Ақтөбе облысында 2006 және 2010 жылы туған жасөспірімдер арасында үстел теннисінен өткен облыстық чемпионатта Алға БЖСМ спортшылары жоғары деңгейде өнер көрсетіп, бірнеше жүлделі орындарды иеленді. 10-15 қаңтар аралығында өткен жарыста Алға қыздар командасы командалық сайыста күміс жүлдеге ие болды. Команда құрамында Руссу Ксения, Дошимова Малика және Тоғызбай Жаннұр бар. Жұптық сында Дошимова Малика бірінші орынды жеңіп алса, Руссу Ксения екінші орынға ие болды. 2010 жылы туған жасөспірімдер арасында Алға ұлдар командасы да ІІІ орынға тұрақтап, Асан Ердәулет пен Ертөстік Жанарыс жұбы жұптық сайыста ІІІ орынға шықты. Бұл жетістіктер жаттықтырушы Ислам Арманбекұлының жоғары деңгейдегі дайындық жұмыстарының жемісі.
Рязань қаласындағы халықаралық самбо жарысындағы жеңістер
Ақтөбе спортшылары Ресейдің Рязань қаласында өткен халықаралық самбо жарысында да өздерін жақсы қырынан танытты. Бегім Амина үш түрлі дисциплинада медаль жеңіп алды: Хьенгте үшінші орынды, Поинтте екінші орынды, Спаррингте үшінші орынды иеленді. Сонымен қатар, Арманқызы Айым Хьенгте алтын медаль жеңіп алса, Вальтер Анель екі алтын мен екі қола медальға ие болды. Бұл жеңістер біздің спортшыларымыздың жоғары деңгейдегі дайындықтарының нәтижесі екенін көрсетеді.
Қазақстан чемпионатындағы волейбол табысы
Ақтөбе қаласының волейбол командасы да еліміздегі ең үздік командалар арасында жоғары нәтиже көрсетіп, Қызылорда облысы Шиелі ауданында өткен Қазақстан Республикасының қысқы Чемпионатында күміс жүлде иеленді. 2012-2013 т.ж. жасөспірімдер арасындағы жарыста Ақтөбе командасының құрамында Алға БЖСМ тәрбиеленушісі Жумагазин Санжар күміс медальға ие болып, команданың табысына үлес қосты.
Әскери қызметшілер арасындағы самбодан алтын жүлде
Қоржынбаев Рустем Елеусізұлының шәкірті, Алға БЖСМ түлегі Хамза Елбол Миртайұлы әскери қызметшілер арасында самбо чемпионатында 71 кг дәрежесінде Қазақстан Республикасының чемпионы атанды. Бұл жеңіс Хамзаның тек спортта ғана емес, әскери салада да жоғары жетістіктерге жетіп жатқанын көрсетеді. Отан алдындағы борышын өтеп жүрген жас спортшының жеңісі өңірдің спорттық жетістіктерін толықтыра түсті.
Спортшыларымыз соңғы бірнеше айда жақсы нәтижелер көрсетіп, өздерінің табыстарымен баршамызды таңғалдыруда. Үстел теннисінен бастап, самбо, волейбол және басқа да спорт түрлерінде жеткен табыстар өңірдің спорттық даму деңгейін айқын көрсетеді. Бұл жетістіктер жас спортшылар мен олардың жаттықтырушыларының қажырлы еңбегінің арқасы, ал келешекте оларды жаңа жеңістер күтіп тұрғаны анық.
Гүлім КЕНЕШОВА