Қызметіне адал, жауапкершілігі жоғары, аудан тұрғындарының көңілінен шығып жүрген өз ісінің шебері, «Алға-Жылу» коммуналдық мемлекеттік мекемесінің Абонент бөлімінде оператор болып жұмыс жасайтын Әбдиева Нұргүл Тапанқызын ерекше атауға болады. Себебі, ол жастайынан нақтырақ айтсақ, осы мекемеде 24 жасынан бастап еңбек етіп келеді. 2006 жылы Алға қаласына келін болып түседі. Бүгінде үш баланың анасы, бақытты отбасының ұйытқысы.
Ол Маңғыстау облысы, Жаңаөзен қаласында 1982 жылы 28 желтоқсанда дүниеге келген. 2011 жылы Қ.Сәтбаев атындағы Қазақ ұлттық техникалық зерттеу университетін «Тау-кен инженері» мамандығы бойынша тәмамдаған. Отбасы мен жүмысты тең баланста ұстап, жетістіктерге де жетуде. Алғашында «Алға-Жылу» мекемесіне аудармашы болып жұмысқа орналасады. Ол кезеңдерде елімізде орыс тіліндегі құжаттар қазақ тіліне аударылсын деген талап қойылып, қазақшаға көшкен кезі болатын. Кейіпкеріміздің айтуы бойынша, Алға қаласы халқының көпшілігі орыс тілді және де қасындағы әріптестерінің ұлты орыс болғандықтан оларға мекемеге келіп түскен барлық қазақ тіліндегі құжаттарды орыс тіліне аударып беретін болған. Одан кейінгі жылдары Техника бөлімінің инженері болып та қызмет еткен.
Нұргүл Тапанқызы өз жұмысы жайында: «Тынымсыз еңбек қашанда адамды шыңдай түседі. Дәл солай мен де өз жұмысыма бар ынта-жігерімді жұмсап, сапалы жасауға тырысып келемін. Біз күнделікті халықпен жұмыс жасағандықтан, алдымызға түрлі адамдар келеді. Олардың әрқайсысының тілін тауып, төлемдер бойынша мұқият түсіндіріп беріп отырамын. Бір кикілжіңдер туындап қалған жағдайда басшыға дейін жеткізбей, сол жерде шешілуін қадағалаймын. Бұндай жағдайлардың алдын-алу өзіңнің жұмысыңа деген жауапкершілік, адалдық деп түсінемін. Тіпті, қасымдағы әріптестерім де «ашумен келген кез-келген тұтынушының тілін тауып, су сепкендей басасың» деп әзілдеп айтып отырады. Биыл аталмыш мекемеде үздіксіз еңбек етіп келе жатқаныма 19 жыл толып отыр. Осы уақыт аралығында көптеген тәжірибе жинақтадым. Ұжымдастарым да керемет жандар. Сөз соңында асыл аналарымызды, қыз-келіншектерді Көктем мерекесімен шын жүректен құттықтаймын! Әрбір күндері бақытты сәттерге толы, денсаулықтары зор, отбасылары аман, табысты болсын демекпін!» — айтып, лебізін білдірді.
Үздіксіз бір мекемеде еңбек ету кез келген адамның қолынан келе бермейтіні рас. Ол үшін еңбек етуге деген ықылас, ниет бірінші орында тұруы қажет. Сонда ғана адам үлкен табысты нәтижелерге қол жеткізеді. Кейіпкеріміз Нұргүлдің де еңбегі еленіп, бірнеше мәрте мекеме басшысы және аудан әкімінің атынан алғыс хат, дипломдармен марапатталған.
Марал ЖАЛҒАСҚЫЗЫ