Шуақты мереке қарсаңындағы кезекті кейіпкеріміз «QazServiceGroup» мекемесінің операторы Эльмира Әділжанқызы туралы да айтпақпыз. Осы аталған мекемеде 2019 жылдан бері жұмыс жасап келеді. 1977 жылы 6 мамырда дүниеге келген, Ақтөбе политехникалық колледжінің түлегі. Эльмираның жұмыс барысындағы негізгі міндеттері аудан бойынша ай сайын тұтынушылардың газ көрсеткіштерін енгізу, газ есептегіштері бойынша өзгерістерді қосу, сонымен қатар жаңадан қосылған тұтынушылардың деректерін жинақтау болып табылады. Әрбір мамандықтың, жұмыстың жеңіл түрі болмайды. Барлығына мұқияттылық, ыждағаттылық, ең бастысы жауапкершілік керек. Кейіпкеріміз Эльмира да өз қызметін тиянақты атқарып, басшылықтың, халықтың көңілінен шығуда. Мысалы, шалғайдағы ауыл тұрғындарының кейбір туындап қалған сұрақтары болса, телефон арқылы түсіндіріп, шешіп беріп те жүр. Жұмыс кезінде кездесіп жататын қиындықтар мен олқылықтарды өзінің жылдар бойы жинақтаған тәжірибесімен жедел шешуге тырысатындығын да айтты. Эльмира «Кешегі күннен сен жақсырақ болуың керек, бірақ басқалардан артық емес» деген өмірлік ұстаным ұстанатындығын жеткізіп, әр адамның жетістікке жетуі тек өзіне ғана байланысты екендігін айтты. Эльмира Әділжанқызы да нәзік жандыларды 8 наурыз – Халықаралық әйелдер күнімен құттықтап, әйел бақытын, Ана бақытын, гармонияға толы мағыналы ғұмыр, денсаулық тіледі.
Марал ЖАЛҒАСҚЫЗЫ