Спортшылар ұлықталды
Спорт күні қарсаңында аудандық мәдениет үйінде ауданымыздың, еліміздің мерейін асқақтатып жүрген спортшыларымызға арналған мерекелік концерт өтті. Жергілікті спортшылардың құрметке бөленген мерекелік кешке аудан әкімінің орынбасары Болатбек Кангужин, «Құрметті спорт қызме 
ткері» наградасының иегері, ҚР еңбегі сіңген жаттықтырушы, каратэден әлем және Еуропа чемпионы, халықаралық санаттағы спорт шебері Әшім Шәріпұлы, ҚР еңбегі сіңген жаттықтырушы Әлімбек Балмағанбетов, MMA – ден ҚР еңбегі сіңген жаттықтырушы Айбек Шоқпытов, Алға ауданының спорт саласына зор үлес қосқан спорт ардагерлері мен жергілікті спортшылар қатысты. Дүбірлі додаларда аудан атын шығарып жүрген спортшыларға аудан әкімінің атынан «Алғыс хат» пен естелік сыйлықтар табысталды.
Қай кезеңді алып қарасаң да, Алға ауданы спорт саласы бойынша үнемі алдыңғы қатарда келеді. Ол өз ісін сүйетін, спорт десе ішкен асын жерге қоятын, жүрегінде туған жерге деген ыстық ықыласы бар, намысы бар спортшыларымыздың арқасы деп білеміз. Түсінген адамға спорттың адам өмірінде алар орны өте зор. Денсаулықтың кепілі болып саналатын спортқа балаларды да баулу жемісті нәтижесін берері анық. Спорт адамды шапшаңдыққа, ерлікке, жігерлі, намысшыл болуға, шыдамдылыққа тәрбиелейді. Ауданымызда кең көлемде өтетін іс-шаралардың барлығында дерлік спорттық жарыстар өткізіліп, оның ішінде ұлттық спорттық ойындарымыз насихатталып жүр. Алдағы уақытта да жерлестеріміздің жеңіс шыңынан талай көрінетіндігіне сеніміз мол.
Мерекелік шарада құттықтау сөз сөйлеген аудан әкімінің орынбасары Болатбек Кангужин былай деді:
- Спорт – бұл өнер. Кез келген мамандықтың үздігі болу үшін 1% талант, 99% еңбек қажет екенін бәріміз де білеміз. «Спорт оқитын әдебиет емес, айтатын ән емес, жазатын жырға да жатпайды. Спорт – бұл қызыққа толы өмір. Табысқа бірден жеткізбейтіні тағы бар. Жеңіс қорқынышты емес, жеңіске сенбеген қорқынышты. Әрбір жаттығу терлегендер үшін лифт, жай келгендер үшін баспалдақ. Спорт-үлкен
тәрбие мектебі. Бүгін қиналасың, тырысасың, ертең бірақ қуанасың, мақтанасың» — деп ақын-жазушы Нарша Бұлғақбаев айтқандай, спорттың адам өмірінде қаншалықты маңызды екенін көруімізге болады.
Бүгінде Алға ауданында осындай жолдың бәрін жүре отырып, аты республикаға, әлемге танылған спорт саңлақтары аз емес. Жалпы байрақты бәсекеде асығы алшысынан түсіп, жеңіспен оралған әрбір спортшымызды батыр деп айтуға әбден болады. Мерекелеріңізбен шын жүректен құттықтаймын! Еліміз аман, жұртымыз тыныш болсын!
Кәсіби мереке күні қарсаңында құрметке бөленіп, сахна төрінен табылғандар саны аз болған жоқ. Түрлі жарыстарда намысты қолдан бермей, ауданымыздың атын шығарып жүрген бірқатар спортшы аудан әкімі Н.Ержановтың «Алғыс хатымен» марапатталып, естелік сыйлықты да алды. Алғысқа бөленгендер қатарында Нұркен Утегенов, Берік Шалабаев, Диана Қоғанатова, Асқар Ергенов, Адайбек Дүйсенбаев, Асылхан Қанатбаев, Қолғанат Хабжалелов, Бөкейхан Елеусіз, Фатима Құрманалина, Туралиева Зайтуна Ерғалиқызы, Полина Волювач, Ернар Жаманбай, Руслан Динеуов, Артем Макиенко, Жандос Динеуов, Ермек Қойшенбаев, Ералы Амангелді, Самир Әкімғали, Берекет Ерұзақов, Ақжүніс Кенжеғұлова бар.
Сонымен қатар ауданымыздың спорт саласында қызмет етіп жүрген азаматтардың да еңбегі елеусіз қалмады. Нұрдәулет Есенжолов, Дархан Тәжіғұлов, Асқар Сағынғали, Дамир Есентүгелов, Әлішер Ідірісов, Дулат Оразалин, Тимур Жаналин, Бауыржан Кенетаев, Нұрлыбек Балмағанбетов, Қазбек Әндіжанов, Қуаныш Тоқсанбаев, Рыскелді Базарбағамбетов, Серікжан Уразов, Арманбек Сарбупин, Серік Қазыбаев, Жеткербай Жолдасов, Мирбол Есенгелдин, Ербол Нәбиев, Күмісбек Умиров, Сабина Ержанова, Аслан Скаков та құрмет төрінен табылып, марапатқа ие болды.
Мерекелік кеш барысында «ҮЗДІК СПОРТ НҰСҚАУШЫСЫ» номинациясына ие болғандар қатарында Әбілқайыр Бисенбайұлы,Темірлан Жидеғали мен Аманжан Шайхы болды. Сонымен қатар жыл бойы спорт саласына етене араласып, белсенділік танытқан ұжымдар марапатталды. Атап айтсақ, Алға аудандық білім бөлімі, Алға балалар мен жасөспірімдер спорт мектебі, аудандық мүгедектер қоғамы, Алға аудандық белсенді өмір орталығы, аудандық аурухана, №1 Алға мектеп-бақшасы, В.И.Пацаев атындағы №2 Алға орта мектебі, №3 Алға қазақ орта мектебі, №4 Алға орта мектебі, Алға мектеп-гимназиясы мен Алға индустриялық-техникалық колледжі ұжымы марапат төрінен көрінді.
Марал Сандыбай