Зорлық-зомбылықпен күрестегі заңнамалық өзгерістер
2024 жылғы 16 маусымда қабылданған заң әйелдер мен балаларға қатысты зорлық-зомбылық үшін жауапкершілікті күшейтті. Бұл – құқық қорғау саласындағы маңызды қадам, себебі отбасылық және тұрмыстық зорлық-зомбылықтың алдын алу, жәбірленушілерді қорғау, сондай-ақ құқық бұзушыларға қатаң жаза тағайындау мәселелері қоғам үшін өзекті болып отыр.
Заңның негізгі мақсаттарының бірі – зорлық-зомбылыққа қарсы күресті күшейтіп қана қоймай, оның алдын алу шараларын жүйелі түрде енгізу. Осыған байланысты:
• Құқық қорғау органдарының жұмысын жетілдіру қажет. Полиция қызметкерлерін жәбірленушілермен жұмыс істеуге арнайы оқыту, зорлық-зомбылық белгілерін ерте анықтауға бағытталған алгоритмдерді енгізу маңызды.
• Жәбірленушілерді қорғау тетіктерін күшейту керек. Дағдарыс орталықтарының санын арттыру, оларды білікті мамандармен (психологтар, заңгерлер, әлеуметтік қызметкерлер) қамтамасыз ету қажет. Қорғаныс ордерлерін беру тәртібін жеңілдету және олардың орындалуын қатаң бақылау маңызды.
• Хабарлау және көмек көрсету жүйесін дамыту қажет. Жәбірленушілердің құқықтық ақпаратқа қолжетімділігін арттыру, 24/7 жұмыс істейтін жедел желілер санын көбейту, сонымен қатар анонимді көмек алу мүмкіндігін кеңейту қажет.
• Қоғамдық сана қалыптастыру шараларын күшейту маңызды. Тұрмыстық зорлық-зомбылықтың алдын алу мақсатында мектептер мен ЖОО-ларда түсіндіру жұмыстарын жүргізу, ақпараттық науқандар ұйымдастыру, БАҚ арқылы халыққа зорлық-зомбылықтың құқықтық және психологиялық салдарын түсіндіру қажет.
Заң қабылданғанымен, оның тиімділігі тәжірибеде қаншалықты дұрыс орындалатынына байланысты. Сондықтан мемлекеттік органдар, үкіметтік емес ұйымдар және қоғам белсенділері бұл өзгерістердің нақты іске асуын қадағалап, қолдау көрсетуі тиіс. Зорлық-зомбылық құрбандарының қауіпсіздігін қамтамасыз ету – тек құқық қорғау органдарының емес, бүкіл қоғамның ортақ міндеті.
И.Карасаева,
мәслихат депутаты