Ауыл тынысы
Өздеріңізге мәлім, әкімдер ауылдық округтерде төбе көрсетіп, халық алдында есеп береді. Алға ауданы әкімінің кезекті кездесуі Үшқұдық ауылдық округінде жалғасты. Аймақ басшысының есептік жүздесуінде ауданның жан-жақты даму бағыттары сөз болып, аталған округтің өзекті мәселелері талқыланды.
Дәстүрлі есеп беру жиынына аудан әкімі Нұрбол Ержанов пен бөлім басшылары және ауыл тұрғындары қатысты.
Алдымен Үшқұдық ауылдық округінің әкімі Берік Ағдаулетов ауыл-аймақ халқының тыныс-тіршілігі мен әкімдіктің атқарған жұмысы туралы баяндап, алдағы міндеттері туралы ақпарат берді.
Дәлірек тоқталар болсақ…
Кездесу барысында тұрғындар мен атқарушы орган өкілдерінің бірлесе атқарған жұмыстарының оң нәтижелері жайында да біраз айтылды.
2024 жылдың І жартыжылдығын қорытындылай келе, біршама жұмыстар атқарылды деп айта аламыз. Халықты әлеуметтік қорғау саласында Үшқұдық ауылдық округінде қаңтар айынан бастап осы уақытқа дейін атаулы әлеуметтік көмек тағайындауға қаңтар, ақпан, наурыз айларына жалпы 12 отбасының өтініштері тіркеліп, 12 отбасыға АӘК тағайындалды. Оның ішінде 10 отбасы шартты көмек ОДП, 2 отбасы шартсыз көмек БДП бойынша. Ақылы қоғамдық жұмыс бойынша 20 адам тіркеліп, жұмысқа орналасқандар саны – 20 адам.
Абаттандыру және санитариялық тазалау акциясы аясында 2 айлық сенбіліктер жүруде. Әр сенбі ауыл ішін қоқыстан тазалау, сыртқа шығару, тал егу, көгалдандыру жұмыстары жүргізіледі. Тал егу жұмыстарына келсек, қазіргі таңда ауыл бойынша жалпы саны 304 көшет отырғызылды. «Бидағұлов Н» ЖК Үшқұдық ауылына 150 түп көшет отырғызуға демеушілік жасаған.
Үшқұдық ауылында спорт кешенінің құрылысы аяқталып, 2024 жылдың 5 қаңтарынан бастап пайдалануға берілген болатын. Қазіргі таңда спорт кешенінде футбол, волейбол, қазақ күресі, грек-рим күресі және үстел теннисі секілді үйірмелер ашылып, спортшыларды қабылдар жатыр.
Жерұйық ауылында «Билайн» байланысы іске қосылып, ауыл тұрғындарының негізгі мәселелерінің бірі өз шешімін тапты. «Нұрсая» ШҚ Үшқұдық ауылдық округіне қарасты Ақсазды ауылы тұрғындарына бөгет салуға ықпал етті.
«Ауыл футболы» жобасы аясында Үшқұдық жастар командасына 10 доп, 10 футбол жейдесі (форма), қосымша 11 футбол жейдесі (форма), 10 доп және спорт құралдарына жоба аясында демеушілікпен көмек көрсетті.
Ветеринария саласы бойынша бүгінгі таңда округте жануарлардың аса қауіпті ауруларының профилактикалық-диагностикалық ветеринариялық іс-шаралардың жоспары бойынша жұмыстары үнемі жүргізілуде.
Бірақ, кездесу барысында тұрғындар тарапынан Ақсазды ауылына дейінгі ауданаралық жолға щебень төсеу, Жерұйық ауылына газ жүргізу, су құбырлары тартылған көшелерді тегістеу және қазылған жерлерді құммен толтыру мәселелері көтерілді.
Тұрғындар тарапынан көтерілген Ақсазды ауылындағы жолға щебень төсеу жұмыстарын аудан басшысы аудандық тұрғын үй коммуналдық шаруашылығы, жолаушылар көлігі және автомобиль жолдары бөліміне тапсырса, Жерұйық ауылындағы көшелерді тегістеу жұмыстарын «Алға-Жылу» КМК басшысына жүктеді.
Жиын соңында Нұрбол Бақытжанұлы «Ауыл аманаты» жобасы аясында 6 млн теңге несие алып, жылыжай құрылысын жүргізген ауыл тұрғыны Алтыбаев Әділ Қуанышбекұлына барып, бастаған кәсібінің барысын қарады.
Кәсіпкер жылыжайдан алғашқы өнімдерін алуда. Қазіргі уақытта сәбіз, жуа, қияр, аскөкті егуде. Алдағы уақытта өнім санын көбейтіп, сатылымға шығару жоспарында бар. Кәсіп иесімен әңгімелескен аудан басшысы алдағы істеріне сәттілік тілеп, бірқатар пікірлерімен бөлісті.
Мәншүк САПАРОВА