Елінің ертеңін жырлаған Әбубәкір Кердеріге құрмет
Алға ауданында жыршы, ақын Әбубәкір Кердері Боранқұлұлының шығармашылығын насихаттауға арналған «Елінің ертеңіне елеңдеген дара тұлға» атты байқау өтті. Мәдениет үйінің коворкинг орталығында ұйымдастырылған бұл шара ұлт руханиятына үлес қосып, жастардың әдебиетке деген қызығушылығын арттыруға бағытталды.
Әбубәкір Кердері – зар заман ақындарының көрнекті өкілі. Ақын шығармаларында заманның ауыр кезеңдерін, қазақ халқының тұрмыс-тіршілігін, дін, ғылым, өнер және имандылық тақырыптарын тереңнен қозғаған. Ақынның өлеңдері ұрпаққа тәлім-тәрбие беруде баға жетпес қазына болып табылады.
Байқаудың басты шарттары бойынша қатысушылар ақынның өмірбаянын зерттеп, шығармаларының мән-мағынасын ашу мақсатында слайдтар дайындап, екі өлеңін жатқа айтты және арнауларынан көріністер қойды. Олар ақынның шығармашылығындағы ұлттық құндылықтар мен рухани тәрбиенің маңыздылығын ашып көрсетті.
Байқаудағы көрнекті өнері үшін І орынға Мақсотова Аққу (Маржанбұлақ ауылы), ІІ орынға Бітімбаева Әсемгүл (Болгарка ауылы), ІІІ орынға Абуева Жұлдыз (Ақай ауылы) ие болды. Сондай-ақ ынталандыру сыйлықтарына Нарбекова Галина, Русина Диана және Сейтова Асел лайық деп танылды.
Бұл байқау жастардың әдебиетке қызығушылығын арттырып қана қоймай, Әбубәкір Кердері сияқты дара тұлғалардың мұрасын жаңа буынға жеткізудегі маңызды қадамдардың бірі болды. Шараның ұйымдастырылуы мәдениет пен әдебиетті дамытуға деген шынайы ұмтылыстың айғағы. Осындай шаралар ұлттың рухани байлығын сақтап, оны болашаққа жеткізудегі басты қадамдардың бірі екені даусыз.
В.Смаилова,
Алға аудандық мәдениет, тілдерді дамыту,
дене шынықтыру және спорт бөлімінің бас маманы